Կեչառիսի վանական համալիրը, որը հիմնվել է XI-XIII դդ. Պահլավունի իշխանների կողմից, միջնադարյան Հայաստանի նշանավոր 

կրոնական ու մշակութային կենտրոններից մեկն էր: Կեչառիսը գտնվում է Կոտայքի մարզի Ծաղկաձոր քաղաքում:

Կեչառիսում ապրել և գործել են ժամանակի խոշոր գիտնականներ ու քաղաքական գործիչներ՝ Գրիգոր Մագիստրոսը, Վասակ Խաղբակյանը, 

Խաչատուր Կեչառեցին և ուրիշներ։ Վանքը իր մեջ ներառում է 4 եկեղեցի, գավիթ, 2 մատուռ և գերեզման:

Համալիրի առաջին և գլխավոր Սուրբ Գրիգոր Լուսավորիչ եկեղեցին կառուցեց Գրիգոր Մագիստրոս Պահլավունին: Հորինվածքով այն գմբեթավոր դահլիճ է՝ բեմի երկուկողմերին երկհարկանի ավանդատներով։ Արտաքին հարդարանքը զուսպ է,

արևելյան ճակատը մշակված է երկու հայկական խորշերով, որոնցից լուսամուտներ են բացված դեպի բեմ։ 

Գլխավոր եկեղեցուց հարավ գտնվում է սլացիկ համաչափություններով գմբեթավոր Սբ. Նշան եկեղեցին։ Համաձայն պատմական տեղեկությունների, այս եկեղեցին նույնպես կառուցվել է Գրիգոր Մագիստրոսի կողմից 1051թ., սակայն այն որոշակի թվագրված չէ: 

Կեչառիս վանքի երրորդ, Սբ.Կաթողիկե եկեղեցին հիմնել է իշխան Վասակ Խաղբակյանը 1203-1214թթ: Սբ. Կաթողիկե եկեղեցին աչքի է ընկնում իր բարդ ճարտարապետությամբ, գեղեցիկ ուրվագծերով և նրբաճաշակ ներքին հարդարանքով:

Սբ.Հարություն ուղղանկյուն եկեղեցին կառուցվել է 1220թ.: Այն ծառայել է որպես գերեզմանատուն եկեղեցու մի շարք առաջնորդների համար: Կեչառիսում կան XII-XIIIդդ. բազմաթիվ խաչքարեր, որոնք գունագեղություն են հաղորդում վանքային համալիրին՝ դառնալով նրա 

բաղկացուցիչ տարրերը։

Այսօր Կեչառիսը վանական համալիրը հանդիսանում է նաև որպես Ծաղկաձորի ամենահայտնի տուրիստական վայրերից մեկը, որը այցելուներին և զբոսաշրջիկներին գրավում է իր պատմությամբ և ճարտարապետական արժեքով: